Abiria kadhaa wamehamishwa kwa dharura kutoka katika meli ya kitalii ya MV Hondius

Abiria kadhaa wamehamishwa kwa dharura kutoka katika meli ya kitalii ya MV Hondius iliyokuwa kitovu cha mlipuko wa virusi vya hantavirus, baada ya meli hiyo kutia nanga kwenye kisiwa cha Tenerife nchini Hispania ikiwa na watu 147 waliokuwa ndani yake.

Operesheni hiyo ya kuwaokoa abiria ilifanyika Jumapili ambapo watu walionekana wakisafirishwa kwa kutumia boti ndogo kutoka kwenye meli hiyo hadi bandarini katika Bandari ya Granadilla. Serikali ya Hispania ilisema zoezi hilo lilifanyika kwa umakini mkubwa kwa kushirikiana na mataifa mbalimbali ili kuhakikisha usalama wa abiria wote.

Waziri wa Afya wa Hispania, , alisema shughuli hiyo ilienda vizuri kulingana na mipango iliyowekwa na mamlaka za afya.

Kwa mujibu wa taarifa za mamlaka za afya nchini humo, siku ya kwanza ya uokoaji ilihusisha abiria 94 kutoka mataifa 19 tofauti, huku wengine wakitarajiwa kuondolewa Jumatatu.

Katika maendeleo mapya, mmoja wa raia 17 wa Marekani waliokuwa ndani ya meli hiyo alikutwa na maambukizi madogo ya aina ya Andes ya virusi vya hantavirus baada ya kufanyiwa kipimo cha PCR. Aidha, mtu mwingine ameripotiwa kuonyesha dalili nyepesi za ugonjwa huo.

Idara ya Afya na Huduma za Kibinadamu ya Marekani imesema wagonjwa hao wawili wako njiani kuelekea katika kituo maalumu cha afya kilichopo Nebraska kwa ajili ya uchunguzi na uangalizi zaidi. Serikali ya Marekani imeeleza kuwa wagonjwa hao wanasafirishwa ndani ya vyumba maalumu vya kujikinga na maambukizi kama tahadhari ya ziada.

Hantavirus ni ugonjwa hatari unaoenezwa zaidi kupitia kinyesi, mkojo au mate ya panya walioambukizwa. Baadhi ya aina zake zinaweza kusababisha matatizo makubwa ya mfumo wa upumuaji na wakati mwingine kusababisha vifo ikiwa matibabu hayatapatikana mapema.

0

0

0