Muigizaji maarufu wa Mexico,Cristo Fernández, ageukia kwenye soka

Muigizaji maarufu wa Mexico,Cristo Fernández, ageukia kwenye soka

Muigizaji maarufu wa Mexico, Cristo Fernández, anayefahamika zaidi kwa nafasi yake ya Dani Rojas katika tamthilia maarufu ya Ted Lasso, ameandika historia mpya kwa kurejea rasmi kwenye soka la ushindani baada ya kusaini na klabu ya Marekani ya El Paso Locomotive FC.

Fernández mwenye umri wa miaka 35, amesajiliwa na timu hiyo inayoshiriki ligi ya daraja la pili nchini Marekani baada ya kufanya majaribio ya miezi miwili yaliyomvutia benchi la ufundi. Hatua hiyo imewashangaza wengi kutokana na ukweli kuwa kwa miaka mingi amekuwa akitambulika zaidi kama mwigizaji kuliko mwanasoka.

Kabla ya kupata umaarufu wa kimataifa kupitia filamu na tamthilia, Fernández alikuwa akicheza soka tangu utotoni katika mji wake wa Guadalajara nchini Mexico. Hata hivyo, ndoto yake ya kuwa mchezaji wa kulipwa ilisimama akiwa na miaka 15 baada ya kupata majeraha ya goti yaliyomlazimu kuachana na mchezo huo.

Baada ya kuhamia London, maisha yake yalibadilika alipoteuliwa kuigiza katika Ted Lasso, tamthilia iliyoshinda tuzo mbalimbali duniani. Kupitia nafasi yake ya Dani Rojas, alijijengea umaarufu mkubwa huku kauli yake maarufu ya “Football is life” ikipendwa na mashabiki wengi wa soka na burudani.

Akizungumzia hatua yake mpya, Fernández alisema soka limekuwa sehemu kubwa ya maisha yake siku zote na ndoto ya kucheza kitaalamu haikuwahi kufa moyoni mwake. Alisema anaishukuru El Paso Locomotive kwa kumpa nafasi ya kuthibitisha uwezo wake na kuamini ndoto zake tena licha ya njia yake kuwa tofauti na wengi walivyotarajia.

Kocha mkuu wa timu hiyo, Junior Gonzalez, amesema ujio wa Fernández utaongeza nguvu mpya kwenye safu ya ushambuliaji ya klabu hiyo, huku akieleza kuwa ana uwezo wa kusaidia timu ndani na nje ya uwanja kutokana na uzoefu wake mkubwa wa maisha.

Safari ya Fernández imeonekana kuwa mfano wa watu wanaoamini kuwa ndoto zinaweza kufuatwa wakati wowote wa maisha, hata baada ya miaka mingi kupita au kubadili taaluma kabisa.

...See more

0

0

0