Mwanzilishi wa CNN Ted Turner afariki Dunia

Mwanzilishi wa CNN Ted Turner afariki Dunia

Mwanzilishi wa kituo cha televisheni cha CNN Ted Turner ameripotiwa kufariki dunia leo Jumatano akiwa na umri wa miaka 87, kwa mujibu wa taarifa kutoka Turner Enterprises. Kifo chake kimeacha pengo kubwa katika tasnia ya habari na mawasiliano duniani.

Ted Turner anatajwa kama mmoja wa watu waliobadilisha kabisa historia ya vyombo vya habari baada ya kuanzisha kituo cha televisheni cha CNN tarehe 1 Juni 1980. CNN ilikuwa chaneli ya kwanza duniani kurusha habari kwa saa 24 mfululizo kupitia mfumo wa cable, jambo lililobadilisha namna watu wanavyopata na kufuatilia taarifa kwa wakati wowote.

Kupitia ubunifu wake, Turner aliijenga Turner Broadcasting kuwa moja ya himaya kubwa katika sekta ya media, akimiliki vituo mbalimbali vya televisheni na kuathiri kwa kiasi kikubwa tasnia ya utangazaji. Mafanikio yake hayakuishia kwenye vyombo vya habari pekee kwani pia aliwahi kumiliki timu ya baseball ya Atlanta Braves na kuwa miongoni mwa wamiliki wakubwa wa ardhi binafsi nchini Marekani.

Katika miaka ya mwisho ya maisha yake, Turner aliweka wazi hali yake ya kiafya ambapo alikuwa akipambana na ugonjwa wa Lewy body dementia. Ugonjwa huu wa ubongo huathiri kumbukumbu, uwezo wa kufikiri, tabia pamoja na hali ya mwili, na ulionekana kuwa na mchango mkubwa katika kudhoofika kwa afya yake.

Kifo cha Ted Turner kinaashiria mwisho wa enzi ya mmoja wa wabunifu waliotoa mchango mkubwa katika mageuzi ya habari duniani. Urithi wake utaendelea kuonekana kupitia maendeleo ya vyombo vya habari vya kisasa vinavyoendeshwa kwa mfumo wa taarifa za saa 24, ambao aliuweka na kuusimamia kwa mafanikio makubwa.

Afyaclass

Comment

Share