Taharuki Nakuru: Treni Yagonga Basi la Wanafunzi Wakiwa Wanaelekea Shuleni
Hali ya taharuki ilitanda katika eneo la Gilgil, Kaunti ya Nakuru nchini Kenya, baada ya treni kugonga basi la shule lililokuwa limewabeba wanafunzi wakielekea shuleni mapema Ijumaa asubuhi. Ajali hiyo ilitokea katika barabara ya Gilgil-Nyahururu kwenye kivuko cha reli, tukio lililozua hofu kubwa kwa wakazi pamoja na wazazi wa wanafunzi hao.
Kwa mujibu wa taarifa za awali, basi hilo la shule ya Teresia School lilikuwa likisafirisha wanafunzi kuelekea masomoni kabla ya kugongwa ghafla na treni iliyokuwa ikipita eneo hilo. Mashuhuda wanasema baada ya kugonga basi hilo, treni iliendelea kulisukuma kwa umbali mfupi hali iliyosababisha mayowe, taharuki na mkanganyiko mkubwa.
Wananchi waliokuwa karibu na eneo la tukio walikimbia haraka kusaidia kuwaokoa wanafunzi waliokuwa ndani ya basi hilo huku vikosi vya uokoaji, polisi pamoja na wahudumu wa afya vikifika muda mfupi baadaye kuendelea na operesheni ya kutoa msaada.
Picha kutoka eneo la tukio zilionyesha wananchi wakiwatoa wanafunzi ndani ya basi huku wengine wakipewa huduma ya kwanza pembeni mwa barabara. Ingawa hakukuwa na taarifa za vifo mara moja baada ya ajali hiyo, baadhi ya wanafunzi waliripotiwa kupata majeraha na kupatiwa matibabu ya haraka na wahudumu wa afya waliokuwa eneo la tukio.
Jeshi la polisi nchini Kenya limeanza uchunguzi wa kina kubaini chanzo halisi cha ajali hiyo. Miongoni mwa mambo yanayochunguzwa ni iwapo dereva wa basi alizingatia taratibu za usalama katika kivuko cha reli kabla ya kujaribu kuvuka njia ya treni.
Ajali hiyo pia ilisababisha msongamano mkubwa wa magari katika barabara hiyo yenye shughuli nyingi huku shughuli za uokoaji na kuondoa mabaki ya ajali zikiendelea kwa muda.
Matukio ya ajali katika vivuko vya reli yamekuwa yakijirudia mara kwa mara katika baadhi ya maeneo ya Afrika Mashariki, jambo linaloendelea kuibua maswali kuhusu usalama wa miundombinu ya reli pamoja na uelewa wa madereva kuhusu sheria za usalama wanapokaribia maeneo hayo hatari.
Wananchi wengi nchini Kenya wameendelea kutuma salamu za pole kwa wanafunzi, wazazi pamoja na shule ya Teresia huku wakitaka hatua kali zaidi zichukuliwe ili kuzuia ajali kama hizi zisijirudie tena siku zijazo.
Post a Comment
Related Discussions...