Wachezaji wa Chelsea FC wanakabiliwa na hatari ya kupunguziwa mishahara yao

Wachezaji wa Chelsea FC wanakabiliwa na hatari ya kupunguziwa mishahara yao kwa kiasi kikubwa kufuatia matumaini yao ya kufuzu kushiriki michuano ya UEFA Champions League msimu ujao kuyumba vibaya.

Hali hiyo imechangiwa na kipigo cha mabao 3-1 walichopata dhidi ya Nottingham Forest siku ya Jumatatu, ambacho kilikuwa ni kipigo cha sita mfululizo katika Premier League. Matokeo hayo yamefifisha kabisa matumaini ya Chelsea kumaliza katika nafasi tano za juu ambazo zingewapa tiketi ya moja kwa moja kushiriki Ligi ya Mabingwa Ulaya.

Bado kuna uwezekano mdogo kwa timu iliyomaliza nafasi ya sita kufuzu iwapo Aston Villa itashinda UEFA Europa League, lakini Chelsea kwa sasa wako nyuma kwa alama nne dhidi ya AFC Bournemouth walio nafasi ya sita, huku zikiwa zimesalia mechi tatu pekee kumalizika kwa msimu.

Kukosa kufuzu kwa Ligi ya Mabingwa hakutaathiri tu mapato ya klabu, bali pia kutagusa moja kwa moja mishahara ya wachezaji wengi wa Chelsea. Mfumo wa mikataba ndani ya klabu hiyo umejikita zaidi katika motisha, ambapo kufuzu kwa michuano hiyo huwapatia wachezaji nyongeza ya takribani asilimia 20 ya mishahara yao.

Msimu uliopita, nyongeza hiyo ilipatikana katika siku ya mwisho ya ligi, lakini safari hii hali inaonekana kuwa tofauti kabisa. Kukosa kufuzu kunamaanisha wachezaji watapoteza bonasi zao muhimu. Kwa mfano, mchezaji anayelipwa takribani pauni 200,000 kwa wiki, ikijumuisha bonasi, anaweza kupoteza karibu pauni milioni 2 msimu ujao. Vivyo hivyo, anayepokea pauni 100,000 kwa wiki atapoteza karibu pauni milioni 1.

Chanzo kimoja kiliiambia Telegraph Sport kuwa hali hiyo ni ya kushangaza, kikisema kuwa kama kuna wachezaji wamepunguza juhudi zao, basi wanajiumiza wenyewe kifedha. Tofauti na baadhi ya vilabu vikubwa, Chelsea hawatoi mishahara mikubwa ya msingi pekee, bali hutegemea zaidi bonasi, hasa zile zinazotokana na kufuzu kwa mashindano makubwa kama Ligi ya Mabingwa.

Kwa ujumla, mustakabali wa kifedha wa wachezaji wa Chelsea sasa unaning’inia kutokana na matokeo mabaya ya hivi karibuni, huku kila mechi iliyobaki ikiwa na uzito mkubwa sio tu kwa heshima ya klabu, bali pia kwa mapato yao binafsi.

Afyaclass

Comment

Share