Bei ya Dizeli Yashuka Kenya Saa Chache Baada ya Mgomo wa Matatu Kutikisa Taifa

Mamlaka ya Kudhibiti Nishati na Petroli nchini kupitia Energy and Petroleum Regulatory Authority(EPRA) imetangaza mabadiliko mapya ya bei za mafuta, siku moja tu baada ya mgomo mkubwa wa usafiri wa umma wa matatu kusababisha taharuki katika maeneo mbalimbali ya nchi hiyo.

Kwa mujibu wa tangazo hilo lililotolewa Mei 19, 2026, bei ya dizeli imeshushwa kwa KSh10.06 kwa kila lita, hatua inayotarajiwa kuleta nafuu kwa baadhi ya sekta zinazotegemea mafuta hayo ikiwemo usafiri na biashara.

Hata hivyo, mafuta ya taa yamepanda kwa kiwango kikubwa cha KSh38.60 kwa lita, jambo ambalo linaweza kuongeza ugumu wa maisha kwa wananchi wengi wanaotumia mafuta hayo majumbani.

Bei mpya zilizotangazwa na EPRA zitadumu hadi Juni 14, 2026 ambapo petroli sasa itauzwa kwa KSh214.25 kwa lita, dizeli kwa KSh232.86 huku mafuta ya taa yakiuzwa kwa KSh191.38 kwa lita.

Tangazo hilo limekuja katika kipindi ambacho taifa hilo bado linajadili athari za mgomo wa matatu uliosababisha usumbufu mkubwa kwa maelfu ya wananchi waliokuwa wakielekea kazini na kwenye shughuli zao za kila siku.

Katika maeneo mengi, huduma za usafiri zilisimama ghafla na kuwaacha wananchi wakihangaika kutafuta njia mbadala za usafiri. Hali hiyo iliwapa nafasi baadhi ya waendesha bodaboda pamoja na magari binafsi kupandisha nauli kwa kiwango kikubwa, jambo lililozua malalamiko kutoka kwa wananchi.

Baadhi ya maeneo pia yalishuhudia wananchi wakifunga barabara na kuchoma matairi wakipinga hali ya usafiri iliyokuwa imejitokeza kabla ya polisi kuingilia kati na kudhibiti vurugu zilizokuwa zinaanza kuenea.

Wachambuzi wa uchumi nchini humo wanaamini kushuka kwa bei ya dizeli kunaweza kusaidia kupunguza gharama za usafirishaji wa bidhaa katika siku zijazo, lakini kupanda kwa mafuta ya taa bado kunabaki kuwa mzigo kwa wananchi wa kipato cha chini.