Janga la Everest la 1996 Lilivyobadili Historia ya Upandaji Milima Duniani
Tarehe 10 Mei 1996 ilibaki kuwa moja ya siku za kusikitisha zaidi katika historia ya Mlima Everest, mlima mrefu zaidi duniani. Zaidi ya wapandaji 30 walijikuta wamekwama karibu na kilele cha mlima huo baada ya kukumbwa na dhoruba kali iliyotokea ghafla.
Katika mazingira ya ukosefu wa oksijeni, uchovu mkubwa na giza nene, wapandaji hao walilazimika kupambana kuokoa maisha yao huku wakikabiliwa na upepo mkali uliokuwa ukivuma kwa kasi ya zaidi ya kilomita 110 kwa saa na baridi kali iliyofikia nyuzi -40 za sentigredi.
Janga hilo liliua watu wanane ndani ya saa 24 pekee, na wakati huo likawa tukio baya zaidi kuwahi kutokea katika historia ya Everest. Hata hivyo, kilichofanya tukio hilo kujulikana zaidi duniani ni namna lilivyoripotiwa na vyombo vya habari, hususan kupitia kitabu maarufu Into Thin Air kilichoandikwa na mwandishi na mpandaji mlima, Jon Krakauer, ambaye alikuwa miongoni mwa walionusurika.
Baada ya tukio hilo, mtazamo wa watu kuhusu Everest ulianza kubadilika. Mlima huo haukuonekana tena kuwa eneo la wapandaji milima wenye uzoefu mkubwa pekee. Kampuni za utalii zilianza kutoa huduma za kuwaongoza watu wa kawaida kufika kileleni kwa mafunzo mafupi na gharama kubwa za fedha.
Mwandishi wa kitabu Everest Inc., Will Cockrell, anaeleza kuwa tukio hilo lilikuwa hatua muhimu ya mabadiliko ya kitamaduni duniani. Kwa mara ya kwanza, watu wengi walianza kuiona Everest kama ndoto inayoweza kufikiwa badala ya changamoto ya wataalamu wachache wa milima.
Leo hii, maelfu ya watu kutoka mataifa mbalimbali hujaribu kupanda Everest kila mwaka, jambo ambalo limeifanya kuwa moja ya vivutio maarufu zaidi vya utalii wa hatari duniani. Hata hivyo, janga la mwaka 1996 linaendelea kukumbusha dunia hatari kubwa zinazoweza kujitokeza katika mazingira magumu ya mlima huo maarufu.
Post a Comment