Maelfu ya Nyuki Wazua Taharuki White House Marekani

Maelfu ya Nyuki Wazua Taharuki White House Marekani

Maelfu ya nyuki wamezua taharuki katika makazi rasmi ya Rais wa Marekani, White House baada ya kuvamia ghafla eneo la North Lawn karibu na sehemu ya waandishi wa habari inayojulikana kama “Pebble Beach”.

Mashuhuda wa tukio hilo walisema kundi kubwa la nyuki lilionekana likiruka angani kama wingu jeusi kabla ya kuelekea kwenye mti uliopo karibu na eneo hilo, ambapo walijikusanya kwa muda na kuingia kwenye mzinga mpya.

Tukio hilo limeibua mjadala mkubwa kwani linatokea wiki chache tu baada ya Melania Trump kutangaza kuongezwa kwa makoloni mapya ya nyuki ndani ya eneo la Ikulu pamoja na uzinduzi wa mzinga mpya uliowekwa katika bustani ya South Lawn.

Hadi sasa bado haijafahamika kama nyuki hao walivutiwa na mazingira hayo mapya yaliyotengenezwa kwa ajili ya ufugaji nyuki au kama walichanganya eneo hilo na makazi yao mapya.

Katika taharuki hiyo, waandishi wa habari pamoja na baadhi ya wafanyakazi wa White House walilazimika kutawanyika kwa muda huku mamia ya nyuki wakionekana wakiruka karibu na jengo la West Wing.

Licha ya tukio hilo kuwashtua wengi, hakuna taarifa rasmi iliyotolewa kuhusu mtu yeyote kujeruhiwa au kudungwa na nyuki hao.

Mradi wa ufugaji nyuki katika White House ulianzishwa mwaka 2009 ukiwa na lengo la kusaidia uhifadhi wa mazingira pamoja na kuongeza uzalishaji wa asali. Asali inayozalishwa hutumika katika mapishi rasmi ya Ikulu, zawadi za kitaifa na pia kusaidia shughuli mbalimbali za kijamii.

Tukio hilo limeacha maswali mengi kuhusu chanzo halisi cha uvamizi huo wa ghafla, huku pia likikumbusha umuhimu mkubwa wa nyuki katika uchavushaji wa mimea, uzalishaji wa chakula na uhifadhi wa mazingira duniani.

...See more

0

0

0