Wagonjwa wanaoshukiwa kuwa na ugonjwa hatari wa Ebola Watoroka

Wagonjwa wanaoshukiwa kuwa na ugonjwa hatari wa Ebola wamezua taharuki kubwa nchini Democratic Republic of the Congo baada ya zaidi ya watu 18 waliokuwa wakipatiwa matibabu kutoroka hospitalini kufuatia mashambulizi yaliyofanywa na familia pamoja na wakazi wenye hasira dhidi ya kituo hicho cha afya.

Tukio hilo limetokea katika Hospitali ya Rufaa ya Mongbwalu iliyopo mkoa wa Ituri, eneo ambalo limekuwa kitovu cha mlipuko mpya wa Ebola uliosababisha vifo vya watu wasiopungua 220 tangu kutangazwa kwa ugonjwa huo mapema mwezi huu.

Kwa mujibu wa maofisa wa afya, wananchi wenye hasira walivamia hospitali hiyo mara kadhaa mwishoni mwa wiki na kuchoma moto baadhi ya mahema yaliyokuwa yakitumiwa na shirika la madaktari lisilo la kiserikali Médecins Sans Frontières, maarufu kama Doctors Without Borders.

Ripoti zinaeleza kuwa baadhi ya familia zilikuwa zikijaribu kuchukua miili ya ndugu zao waliokufa kutokana na Ebola kwa nguvu, hali iliyosababisha vurugu kubwa ndani ya kituo hicho cha matibabu.

Madaktari wamesema wagonjwa wanne kati ya waliotoroka walifanyiwa vipimo tena, ambapo mmoja alithibitishwa kuwa na virusi vya Ebola. Mkurugenzi wa hospitali hiyo, Dkt. Richard Lokodu, ameonya kuwa mgonjwa huyo bado alikuwa akizunguka kwenye jamii, jambo linaloongeza hofu ya kusambaa zaidi kwa maambukizi hayo.

Aidha, mgonjwa mwingine aliyekuwa katika hali mbaya ameripotiwa kufariki dunia alipokuwa akijaribu kutoroka wakati wa mashambulizi hayo.

Wataalamu wa afya wameeleza kuwa taarifa potofu na kutokuamini juhudi za serikali pamoja na hospitali vinachochea upinzani dhidi ya hatua za kudhibiti Ebola. Baadhi ya wananchi wanaamini kuwa ugonjwa huo ni wa kutungwa au unatumiwa na hospitali kujinufaisha kifedha.

Shirika la Afya Duniani, World Health Organization, limeonya kuwa mlipuko huo sasa unaenda kasi kuliko uwezo wa kudhibitiwa. Wakati huo huo, nchi jirani ya Uganda imethibitisha kuwepo kwa visa vingine vya Ebola vinavyohusisha wahudumu wa afya katika mji wa Kampala.

Wataalamu wanasema aina ya virusi vya Bundibugyo inayosababisha mlipuko wa sasa bado haina chanjo rasmi wala tiba maalumu iliyothibitishwa, hali inayofanya juhudi za kuuzuia ugonjwa huo kuwa ngumu zaidi.

...See more

0

0

0