Bondia wa Tanzania Hassan Mwakinyo amepoteza pambano lake la kuwania ubingwa wa dunia wa IBO baada ya kuchapwa kwa Technical Knockout (TKO) na bondia mwenye uraia wa Ivory Coast na Ufaransa Michel Soro katika pambano lililofanyika jijini Abidjan, Ivory Coast usiku wa Juni 11, 2026.
Pambano hilo la uzito wa middleweight lilikuwa la raundi 12, ambapo Mwakinyo alionyesha ushindani mkubwa katika raundi za mwanzo kabla ya Soro kuanza kutawala mchezo kadri pambano lilivyoendelea. Mwamuzi alilazimika kusimamisha pambano hilo katika raundi ya 9 baada ya Mwakinyo kushindwa kujibu mashambulizi mfululizo ya mpinzani wake.
Kwa matokeo hayo, Mwakinyo amepoteza nafasi ya kutwaa mkanda wa IBO na kuongeza rekodi yake ya mapambano yaliyopotea kufikia manne katika maisha yake ya ngumi za kulipwa. Kati ya mapambano hayo manne, moja alipoteza kwa pointi huku matatu akipigwa kwa KO/TKO.
Kwa upande wa Michel Soro, ushindi huo unaendelea kuthibitisha uzoefu wake mkubwa katika medani ya kimataifa ya ngumi. Bondia huyo sasa amecheza mapambano 45 ya kulipwa, akishinda mara 38, huku ushindi wa KO/TKO ukiwa 28. Pia amepoteza mara nne na kutoka sare mara mbili.
Mwakinyo alikuwa akiingia kwenye pambano hilo akiwa na rekodi nzuri ya ushindi wa mapambano matano mfululizo tangu kupoteza kwake dhidi ya Liam Smith mwaka 2022 nchini England.
Pambano hilo lilikuwa sehemu ya usiku mkubwa wa ngumi ulioandaliwa na Dream Ring Promotions nchini Ivory Coast, huku mashabiki wengi wa Tanzania wakifuatilia kwa matumaini ya kuona Mwakinyo akiandika historia mpya ya kutwaa ubingwa mkubwa wa kimataifa.
Post a Comment