Ebola Yaendelea Kusambaa Afrika ya Kati, Visa Vyakaribia 500
Mlipuko wa ugonjwa wa Ebola unaendelea kuleta hofu katika mataifa ya Afrika ya Kati baada ya idadi ya visa vilivyothibitishwa kufikia karibu 500, huku vifo vikiongezeka kwa kasi katika kipindi kifupi.
Kwa mujibu wa Shirika la Afya Duniani (WHO), hadi sasa visa 452 vimethibitishwa katika Jamhuri ya Kidemokrasia ya Congo (DRC), ambapo watu 82 wamefariki dunia kutokana na ugonjwa huo. Nchini Uganda, visa 19 vimethibitishwa na watu wawili wamepoteza maisha.
Takwimu hizo zinaonyesha ongezeko kubwa la maambukizi ndani ya muda mfupi, huku zaidi ya visa 100 vipya na vifo zaidi ya 20 vikirekodiwa katika kipindi cha siku moja pekee. Hali hiyo imezua tahadhari kwa wataalamu wa afya wanaohofia mlipuko huo unaweza kuendelea kuenea iwapo hatua za haraka hazitachukuliwa.
WHO imeeleza kuwa mlipuko wa sasa unasababishwa na aina adimu ya virusi vya Ebola inayojulikana kama Bundibugyo. Aina hiyo kwa sasa haina chanjo wala tiba iliyoidhinishwa rasmi, jambo linaloongeza changamoto katika juhudi za kudhibiti maambukizi.
Mkurugenzi Mkuu wa WHO, Tedros Adhanom Ghebreyesus, amesema nchi zote zinazohusika zinapaswa kushirikiana kwa karibu ili kuzuia ugonjwa huo kusambaa zaidi. Ameonya kuwa kasi ya maambukizi inahitaji hatua za dharura za afya ya umma ili kulinda maisha ya wananchi.
Wataalamu wa afya pia wamekumbusha kuwa Afrika iliwahi kushuhudia janga kubwa la Ebola mwaka 2014 katika Afrika Magharibi, ambalo liliua zaidi ya watu 11,000. Kutokana na kumbukumbu hiyo, mamlaka za afya zinahimizwa kuimarisha uchunguzi, ufuatiliaji wa wagonjwa na kampeni za uelimishaji wa jamii ili kudhibiti mlipuko wa sasa kabla haujafikia kiwango kikubwa zaidi.
Mlipuko huu ulitangazwa rasmi mwezi Mei mwaka huu na unaendelea kufuatiliwa kwa karibu na mashirika ya afya ya kimataifa pamoja na serikali za nchi zilizoathirika.
Post a Comment