Trump: Mazungumzo na Iran Bado Magumu, Lakini Matumaini Yapo
Rais wa Marekani, Donald Trump, amesema juhudi za kufikia makubaliano kati ya Marekani na Iran bado zinakumbana na changamoto kubwa kutokana na msimamo mkali wa Tehran katika mazungumzo yanayoendelea.
Akizungumza na waandishi wa habari, Trump alisema Iran ni taifa lenye ushawishi mkubwa na lenye msimamo usioyumba kirahisi, jambo ambalo limeifanya kuwa vigumu kwao kukubaliana na mapendekezo yaliyowekwa mezani na Washington.
Kiongozi huyo pia alidai kuwa uwezo wa kijeshi wa Iran umeathiriwa kwa kiasi kikubwa baada ya mashambulizi yaliyolenga miundombinu ya kijeshi. Alisema sehemu kubwa ya vituo vya kutengeneza makombora pamoja na maeneo ya kurushia silaha imeharibiwa, ingawa bado Iran inaendelea kuwa na akiba ya makombora na ndege zisizo na rubani.
Trump aliongeza kuwa Marekani ina taarifa za kiintelijensia kuhusu maeneo yanakohifadhiwa baadhi ya silaha hizo zilizobaki, akisisitiza kuwa hali hiyo inafuatiliwa kwa karibu.
Licha ya ugumu uliopo katika mazungumzo hayo, rais huyo amesema hajapoteza matumaini ya kuona pande hizo mbili zikifikia mwafaka utakaosaidia kupunguza mvutano uliodumu kwa muda mrefu kati ya Marekani na Iran.
Kauli za Trump zinakuja wakati dunia ikiendelea kufuatilia kwa karibu mwelekeo wa uhusiano wa mataifa hayo mawili, ambao kwa miaka mingi umehusisha migogoro ya kisiasa, kiusalama na masuala ya nyuklia.
Post a Comment