Mapacha Walioungana Kichwani watenganishwa kwa mafanikio KWA MSAADA WA AI

✍️Author: Dr. Ombeni

🛡️Review: AfyaClass

Mapacha Walioungana Kichwani watenganishwa kwa mafanikio KWA MSAADA WA AI

Katika mafanikio makubwa ya tiba duniani, mapacha Mercy na Wema kutoka Nigeria waliozaliwa wakiwa wameungana kwenye fuvu la kichwa wamefanikiwa kutenganishwa kupitia upasuaji wa hali ya juu uliosaidiwa na Teknolojia ya Akili Unde (AI).

Mapacha hao walipelekwa Uingereza wakiwa na umri wa miezi sita baada ya kupata ufadhili wa matibabu kutoka shirika la hisani la Gemini Untwined. Matibabu yao yaliongozwa na daktari bingwa wa upasuaji wa neva, Profesa Noor ul Owase Jeelani.

Timu ya wataalamu zaidi ya 60 kutoka nchi 20 ilitumia miezi kadhaa kujiandaa kwa upasuaji huo kwa kutumia AI, teknolojia ya uhalisia pepe (VR), mifano ya 3D na picha za uhalisia ulioboreshwa. Teknolojia hizo zilisaidia kuchora ramani sahihi ya mishipa ya damu na sehemu za ubongo ambazo mapacha hao walikuwa wakishirikiana.

Upasuaji huo ulifanyika kwa awamu nne tofauti na kuchukua jumla ya saa 40 ndani ya kipindi cha miezi minne. Hatua ya mwisho ya upasuaji ilifanyika Juni 2026 katika Abu Dhabi, ambapo madaktari bingwa 13 walishiriki kuhakikisha operesheni hiyo inafanikiwa.

Wataalamu wa afya wanaeleza kuwa matumizi ya AI katika upasuaji yameongeza uwezo wa madaktari kupanga na kutekeleza operesheni ngumu kwa usahihi mkubwa zaidi, jambo linalopunguza hatari za matatizo wakati wa upasuaji.

Baada ya safari ndefu ya matibabu, Mercy na Wema wamepona vizuri na sasa wameadhimisha miaka yao mitatu ya kuzaliwa nchini Nigeria pamoja na familia yao. Mafanikio hayo yanaonesha jinsi teknolojia ya kisasa inavyoendelea kubadilisha huduma za afya na kutoa matumaini mapya kwa wagonjwa wenye matatizo magumu duniani.

Takwimu: Watoto wanaozaliwa wakiwa wameungana hutokea kwa wastani wa mtoto mmoja kati ya vizazi 50,000 hadi 200,000 duniani. Visa vya mapacha walioungana kichwani (Craniopagus Twins) vinakadiriwa kuwa chini ya asilimia 5 ya visa vyote vya mapacha walioungana.