Safari ya Kassim Majaliwa hadi Uwaziri Mkuu wa Jamhuri ya Muungano wa Tanzania

Kassim Majaliwa Majaliwa ni Waziri Mkuu wa Jamhuri ya Muungano wa Tanzania ambaye amehudumu katika nafasi hiyo tangu Novemba 2015 hadi sasa. 

Alizaliwa  Desemba 22, 1961 katika Kijiji cha Namoto, Wilaya ya Ruangwa, Mkoa wa Lindi.

Ni kiongozi ambaye safari yake ya kisiasa imejengwa juu ya misingi ya elimu, uwajibikaji na uadilifu.

Majaliwa alianza elimu yake ya msingi katika Shule ya Msingi Mnacho, ambako alihitimu mwaka 1979. Baadaye alijiunga na Shule ya Sekondari Kigonsera mkoani Ruvuma.

Kwa kuwa alikuwa na shauku kubwa ya kufundisha, alisomea ualimu katika Chuo cha Ualimu Mtwara na baadaye Chuo cha Ualimu Kitangali kilichopo Mtwara.

Alijiendeleza kielimu hadi kupata shahada kutoka Chuo Kikuu Huria cha Tanzania (Open University of Tanzania).

Kabla ya kuingia kwenye siasa, Majaliwa alifanya kazi ya ualimu na kushika nafasi mbalimbali za uongozi ndani ya sekta ya elimu, ikiwa ni pamoja na kuwa Mkuu wa Shule. Umahiri wake katika kazi uliwavutia viongozi wa kisiasa na hatimaye aliingia rasmi katika siasa mwaka 2010, alipogombea na kushinda kiti cha Ubunge wa Jimbo la Ruangwa kupitia Chama Cha Mapinduzi (CCM).

Baada ya kuchaguliwa kuwa Mbunge, aliteuliwa kuwa Naibu Waziri Ofisi ya Waziri Mkuu Tawala za Mikoa na Serikali za Mitaa (TAMISEMI), ambako alisimamia masuala ya elimu.

Uteuzi wake kuwa Waziri Mkuu mwaka 2015 ulileta mshangao kwa wengi, lakini ulibeba ujumbe wa wazi wa kusisitiza uwajibikaji na unyenyekevu katika utumishi wa umma. Alithibitishwa tena katika wadhifa huo mwaka 2020 baada ya kushinda tena ubunge wa Ruangwa, na ameendelea kuhudumu chini ya Rais Samia Suluhu Hassan hadi sasa.

Majaliwa ameendelea kuwa miongoni mwa viongozi wanaoaminiwa kwa uchapakazi, unyenyekevu, na uzalendo, na historia yake inaonyesha wazi kuwa ni mfano bora wa kiongozi aliyejipambanua kutoka katika mazingira ya kawaida hadi kushika nafasi ya juu ya uongozi nchini.