Kampuni ya Meta, hapo awali inayojulikana kama Facebook, imepanga kuondoa takriban wafanyakazi 600 kutoka katika kitengo chake cha AI, hatua inayolenga kurekebisha muundo wa kazi na kuongeza ufanisi wa timu.

Wafanyakazi hao walihusiana na Meta Superintelligence Labs, kitengo kinachojihusisha na utafiti na maendeleo ya mifumo ya akili bandia.

Alexandr Wang, Afisa Mkuu wa AI wa Meta, alieleza katika barua ya ndani aliyowaandikia wafanyakazi kuwa hatua hii inalenga kurahisisha maamuzi na kuongeza mchango wa kila mfanyakazi:

“Kwa kupunguza ukubwa wa timu, maamuzi yatakuwa haraka na kila mtu atakuwa na jukumu kubwa na nafasi ya kuathiri zaidi,” alisema Wang.

Aidha, Wang alithibitisha kuwa kampuni itasaidia wafanyakazi walioathirika kupata nafasi nyingine ndani ya Meta

“Hili ni kundi lenye vipaji, na tunahitaji ujuzi wao katika sehemu nyingine za kampuni,” aliandika.

Hata hivyo, hatua ya kupunguza wafanyakazi haijagusa kitengo cha TBD Lab, ambacho kipo chini ya Superintelligence Labs na kinajihusisha na kuendeleza mifumo ya kizazi kijacho ya AI, ambacho bado kinaendelea kuajiri wafanyakazi wapya.

Hatua hii ya Meta inajitokeza huku kampuni ikijaribu kuimarisha tija na ubora wa bidhaa zake za AI, ikilenga kuhakikisha kila timu ina nafasi kubwa ya kuchangia kwa ufanisi zaidi.